HORARIO
O horario de funcionamento habitual é de 7:45 a 20:00, aínda que a escola infantil abrirá un mínimo de 8 horas diarias en xornada partida ou continuada, cinco días á semana de luns a venres e doce meses ao ano, salvo causa xustificada. Non obstante, a escola poderá determinar os seus calendarios e horarios de apertura e peche ao público en función da demanda existente e da necesaria conciliación. As causas dos peches, estarán acreditadas.
PERÍODO DE ADAPTACIÓN
A escola planifica o período de adaptación e conta cun protocolo de adaptación. Na maioría dos casos, non debería de ser superior a 15 días a non ser que sexa xustificado pola dirección da escola.
SERVIZO DE COMEDOR
A escola conta con servizo de comedor. As familias que desexen facer uso deste servizo deberán traer a comida preparada da casa e esta será quentada no centro e administrada aos nenos e nenas polo persoal do centro. As prazas para este servizo son limitadas, polo que as familias que fagan uso del deberán solicitalo canto antes e seguir as recomendacións do Servizo de Inspección da Consellería de Sanidade, que serán explicadas polo persoal da escola.
ACTIVIDADES
Ademais das actividades pedagóxicas levadas a cabo na escola, participamos en todas aquelas organizadas polo Concello de Santiago de Compostela e dirixidas aos máis pequenos/as: audicións, contacontos, visitas guiadas aos parques e xardíns da cidade, percorridos pola Alameda e casco histórico... Tamén organizamos actividades musicais guiadas por especialistas e exposicións de pintura e artes plásticas. Cada ano realizamos unha exposición dos traballos do alumnado.
INFORMES PEDAGÓXICOS
Como mínimo dúas veces ao longo do curso, o centro convoca a todas as familias que así o desexen para comentar o informe pedagóxico dos/as nenos/as. Nestas reunións trátanse todos os aspectos relacionados co seu desenvolvemento, adaptación, relación cos demais nenos/as e cos/as mestres/as, dinámica nos talleres e cursos, consecución dos obxectivos pedagóxicos... Asemade trátanse todas as cuestións que poidan ser de interese para as familias. Ademais destas reunións, pódese concertar unha titoría cando así o desexen.
CURSOS
O centro adoita desenvolver actividades de achegamento a linguas estranxeiras dende outubro a xuño. Tamen contamos cun cursiño de lingua inglesa durante todo o curso escolar, en colaboración coa Speak English Academy. Nos meses de xaneiro a maio lévase a cabo, como vén sendo habitual, o cursiño de natación nas instalacións do centro Awasan, en Silvouta. Para iso, contamos cunha empresa de autocares para o servizo de transporte.
INSTALACIÓNS
- Pequena biblioteca
- Zona de usos múltiples
- Zona de cambio e descanso
- Zona de xogo simbólico
- Zona de psicomotricidade
- Cociña
- Baños
- Patio exterior
- Espazo destinado ás reunións coas familias
- Acceso a persoas con discapacidade
- Zona de aparcadoiro temporal
Escola adscrita á axuda da Consellería de Política Social para o fomento da
gratuidade da atención educativa para segundos/as fillos/as e sucesivos/as en escolas infantís 0-3.